రాజేంద్రనగర్‌లోనే చిరుత తిష్ఠ!

రాజేంద్రనగర్‌: రాజేంద్రనగర్‌లోని వ్యవసాయ వర్సిటీ, జాతీయ వ్యవసాయ విస్తరణ పరిశోధనా సంస్థ(నార్మ్‌) పరిసరాల్లోని అటవీ ప్రాంతంలోనే చిరుత తలదాచుకుందని అటవీశాఖ అధికారులు నిర్ధారించారు. గురువారం సీసీ కెమెరాల్లో చిరుత సంచరించిన దృశ్యాలు నమోదుకావడంతో శుక్రవారం ఉదయం రాజేంద్రనగర్‌ పోలీసులు, అటవీశాఖ అధికారులు అక్కడి ప్రదేశాన్ని పరిశీలించారు. చిరుత పాదముద్రలను గుర్తించారు. ఈనెల 14న మైలార్‌దేవ్‌పల్లిలో కనిపించిన చిరుత అక్కడి నుంచి ఈ ప్రాంతానికి చేరుకుందని అధికారులు భావిస్తున్నారు. ప్రస్తుతం అటవీ ప్రాంతంలో ఉన్నందున ఎలాంటి చర్యలు తీసుకోవాల్సిన అవసరంలేదని అధికారులు తెలిసింది. సీసీ కెమెరాలు ఏర్పాటు చేసి కదిలికలు గమనిస్తూ, జనాల్లోకి వచ్చే అవకాశాలుంటేబంధించే విషయంపై ఆలోచించనున్నట్లు పేర్కొంటున్నారు.