నిమ్మగడ్డ కేసులో కామినేని కేవియట్‌ పిటిషన్‌

దిల్లీ: నిమ్మగడ్డ రమేశ్‌ కుమార్‌ వ్యవహారంపై భాజపా నేత, మాజీ మంత్రి కామినేని శ్రీనివాస్ సుప్రీంకోర్టులో కేవియట్‌ పిటిషన్‌ దాఖలు చేశారు. ఎస్‌ఈసీ మార్పు వ్యవహారంపై ఏపీ హైకోర్టు ఇచ్చిన తీర్పుపై రాష్ట్ర ప్రభుత్వం సుప్రీంకోర్టులో స్పెషల్‌లీవ్‌ పిటిషన్‌ దాఖలు చేసింది. ఈ నేపథ్యంలో   కామినేని కేవీయట్‌ పిటిషన్‌ వేశారు. రమేశ్‌ కుమార్‌ తొలగింపు వ్యవహారంలో కామినేని హైకోర్టులోనూ ప్రజా ప్రయోజన వ్యాజ్యం వేసిన విషయం తెలిసిందే. భాజపా కేంద్ర నాయకత్వం అనుమతితోనే సుప్రీంకోర్టులో తాను కేవియట్‌ పిటిషన్‌ దాఖలు చేసినట్టు కామినేని తెలిపారు. ఇదే అంశంపై ఇప్పటికే కాంగ్రెస్‌ కాంగ్రెస్‌ నేత మస్తాన్‌వలీ కూడా కేవియట్‌ పిటిషన్‌ వేశారు.

హైకోర్టులో పిటిషన్‌ ఉపసంహరించుకున్న ప్రభుత్వం 
అమరావతి: నిమ్మగడ్డ రమేశ్‌ కుమార్‌ కేసులో స్టే ఇవ్వాలని కోరుతూ హైకోర్టులో వేసిన పిటిషన్‌ను   ఏపీ ప్రభుత్వం ఉపసంహరించుకుంది. ఇదే అంశంపై సుప్రీంకోర్టులో పిటిషన్‌ వేసినందున హైకోర్టులో పిటిషన్‌ ఉపసంహరించుకుంటున్నట్టు విచారణలో తెలిపింది. హైకోర్టు తీర్పు అమలుపై స్టే కోరుతూ నిన్న సుప్రీంకోర్టును ఆశ్రయించామని ప్రభుత్వం తరఫు న్యాయవాది ధర్మాసనానికి తెలిపారు.