ముంబయికి పొంచివున్న మరో మప్పు

ముంబయి: కరోనాతో అతలాకుతలమవుతున్న ముంబయికి నిసర్గ తుపాను రూపంలో మరో విపత్తు పొంచి ఉంది. అరేబియా సముద్రంలో ఏర్పడిన వాయుగుండం ఈ మధ్యాహ్నానికి తీవ్ర వాయుగుండంగా మారనుందని వాతావరణ కేంద్రం వెల్లడించింది. మరో ఆరు గంటల్లో తీవ్ర వాయుగుండం ..తుపానుగా మారనుందని తెలిపింది. నిసర్గ తుపాను రేపు మధ్యాహ్నం ఉత్తర మహారాష్ట్ర, దక్షిణ గుజరాత్‌లో తీరం దాటే అవకాశముందని అధికారులు తెలిపారు. 

తూర్పు మధ్య అరేబియా సముద్రంలో గోవాకు నైరుతి దిశలో 280 కి.మీ దూరంలో, ముంబయికి 490 కి.మీ, సూరత్‌కు 710 కి.మీ దూరంలో వాయుగుండం కేంద్రీకృతమై ఉందని వాతావరణశాఖ వెల్లడించింది. తుపాను తీరాన్ని తాకే సమయానికి గాలులు గంటకు 105 నుంచి 110 కిలోమీటర్ల వేగంతో  వీస్తాయన్న వాతావరణశాఖ ముంబయిపై తుపాను ప్రభావం అధికంగా ఉందని హెచ్చరించింది. వాతావరణశాఖ తుపాను హెచ్చరికల నేపథ్యంలో గోవా, మహారాష్ట్ర, గుజరాత్‌ ప్రభుత్వాలు హై అలర్ట్‌ ప్రకటించాయి.