చింతమనేనికి రిమాండ్‌

ఏలూరు నేరవార్తలు: దెందులూరు మాజీ ఎమ్మెల్యే చింతమనేని ప్రభాకర్‌కు కోర్టు 14 రోజుల రిమాండ్‌ విధించింది. లాక్‌డౌన్‌ నిబంధనలు పాటించకుండా పోలీసు విధులకు ఆటంకం కలిగించారనే ఆరోపణలపై ప్రభాకర్‌ను ఏలూరు గ్రామీణ పోలీసులు శుక్రవారం అరెస్టు చేశారు. పోలీసుల వివరాల ప్రకారం.. ఈ నెల 12న అచ్చెన్నాయుడిని అరెస్టు చేసి విజయవాడకు తీసుకెళ్తుండగా.. నిరసనగా చింతమనేని ప్రభాకర్‌ కార్యకర్తలతో కలసి జాతీయ రహదారి కలపర్రు టోలుగేటు వద్దకు వెళ్లారు. పోలీసులు చింతమనేనిని, మరో 8మంది అనుచరులను అదుపులోకి తీసుకున్నారు. రాత్రంతా పోలీసుస్టేషన్‌లో ఉంచి, కేసులు నమోదు చేశారు. శనివారం అమీనాపేటలోని న్యాయమూర్తి నివాసానికి తీసుకెళ్లి హాజరుపరిచారు. చింతమనేనికి, అనుచరులు 8 మందికి రిమాండ్‌ విధించారు.