ఏపీలో పది పరీక్షలు రద్దు చేయాలి: అనగాని

అమరావతి: కేబినెట్‌ మీటింగ్‌ సరిగా నిర్వహించలేని ప్రభుత్వం పదో తరగతి పరీక్షలు ఎలా నిర్వహిస్తుందని రేపల్లె తెదేపా ఎమ్మెల్యే అనగాని సత్యప్రసాద్‌ ప్రశ్నించారు. కరోనా నివారణలో రాష్ట్ర ప్రభుత్వం ఘోరంగా విఫలమైందని విమర్శించారు. పదో తరగతి పరీక్షలు నిర్వహించాలన్న ప్రభుత్వ నిర్ణయంతో విద్యార్థుల తల్లిదండ్రులు తీవ్ర ఆందోళనకు గురవుతున్నారన్నారు. పదో తరగతి పరీక్షలు రద్దు చేయాలని డిమాండ్‌ చేశారు. 

 కరోనా వైరస్‌కు భయపడి ముఖ్యమంత్రి తాడేపల్లి ప్యాలెస్‌ నుంచి, మంత్రులు తమ నియోజకవర్గం దాటి బయటకు రావడం లేదని... ఇలాంటి పరిస్థితుల్లో విద్యార్థులు పరీక్షా కేంద్రాలకు ఎలా వస్తారని ప్రశ్నించారు. తెలంగాణ ప్రభుత్వం మాదిరిగా ఏపీలో కూడా  పదో తరగతిపరీక్షలు రద్దు చేసి విద్యార్థులను పాస్‌ చేయాలని విజ్ఞప్తి చేశారు. రాష్ట్రంలో రోజు రోజుకీ కరోనా కేసులు వందల సంఖ్యలో పెరుగుతుంటే.. పదో తరగతి  పరీక్షలు నిర్వహించి విద్యార్థుల ప్రాణాలతో చెలగాటమాడతారా? అని ధ్వజమెత్తారు.