జీజీహెచ్‌లో కోలుకుంటున్న అచ్చెన్నాయుడు

గుంటూరు: టీడీఎల్పీ ఉపనేత, టెక్కలి ఎమ్మెల్యే అచ్చెన్నాయుడు శస్త్రచికిత్స గాయం నుంచి నెమ్మదిగా కోలుకుంటున్నారు. జీజీహెచ్‌లో చికిత్స పొందుతున్న ఆయనను ఆసుపత్రిలోని రెండో అతస్తు గదికి తరలించారు. జ్యుడీషియ్‌ల్‌ కస్టడీలో ఉన్నందున పోలీసులు ఎవరినీ అనుమతించడంలేదు.
ఈఎస్‌ఐ కుంభకోణం ఆరోపణలతో శుక్రవారం ఉదయం అరెస్టయిన అచ్చెన్నాయుడిని దాదాపు 24 గంటల తర్వాత (శనివారం ఉదయం) గుంటూరు జీజీహెచ్‌లో చేర్పించిన విషయం తెలిసిందే. న్యాయమూర్తి ఆదేశాల మేరకు ఆయనను ఆసుపత్రిలో చేర్చుకుని జనరల్‌ సర్జరీ వైద్యుల పర్యవేక్షణలో చికిత్స అందిస్తున్నారు.