ఎల్జీ ఘటనలో స్టేకు సుప్రీం నిరాకరణ

అమరావతి: విశాఖ ఎల్జీ పాలిమర్స్ యాజమాన్యం దాఖలు చేసిన పిటిషన్‌పై ఇవాళ సుప్రీం కోర్టులో విచారణ జరిగింది. హైకోర్టు ఆదేశాలపై స్టే ఇచ్చేందుకు సుప్రీం నిరాకరించింది. పెండింగ్ పిటిషన్ల విచారణ వచ్చే వారం చివర్లోగా ముగించాలని హైకోర్టుకు సూచిస్తామని పేర్కొంది. సుమోటోగా కేసు తీసుకునే అధికారం ఉందని ఇప్పటికే ఎన్జీటీ స్పష్టం చేసిందని సుప్రీం వ్యాఖ్యానించింది.

అలాగే ఎన్జీటీ ఆదేశాలతో డిపాజిట్ చేసిన రూ.50 కోట్ల పంపిణీని 10 రోజుల పాటు ఆపాలని మధ్యంతర ఆదేశాన్నిచ్చింది. ఎన్జీటీ ఆదేశాలను సవాల్ చేస్తూ అప్లికేషన్ సమర్పించాలని పిటిషనర్‌కు సూచించింది. ఎల్జీ పాలిమర్స్ తరఫున వాదించిన సీనియర్ న్యాయవాది ముకుల్ రోహత్గీ... ప్లాంటును సీల్ చేయాలన్న హైకోర్టు ఆదేశాలు సరికావన్నారు. అది రాజ్యాంగ విరుద్ధమని వాదించగా... అలా భావించట్లేదని న్యాయస్థానం స్పష్టం చేసింది. ఈ విషయంలో జోక్యం చేసుకోవాలనుకోవట్లేదని తెలిపింది. అనంతరం తదుపరి విచారణను రెండు వారాలకు వాయిదా వేసింది.