దేశం వారి త్యాగాలను ఎన్నటికీ మరవదు

హైదరాబాద్‌: భారత్‌-చైనా సరిహద్దుల్లో జరిగిన ఘర్షణలో వీర మరణం పొందిన కర్నల్‌ సంతోష్‌ కుమార్‌ కుటుంబానికి రాష్ట్ర గవర్నర్‌ తమిళిసై సౌందర రాజన్‌ ప్రగాఢ సానుభూతి తెలియజేశారు. ఆయనతోపాటు దేశ భద్రత కోసం ప్రాణాలర్పించిన వీర జవాన్లకు గవర్నర్‌ నివాళులర్పించారు. ఈ ఘటన మానని గాయంగా మిగిలిపోతుందని ఆమె అభిప్రాయపడ్డారు. సైనికులు అత్యంత ధైర్యసాహసాలు ప్రదర్శించారని కొనియాడారు. దేశం వారి త్యాగాలను ఎన్నటికీ మరవదని.. యావత్‌ దేశ ప్రజలు అమరులైన సైనికులను స్మరించుకుంటారని ఈ సందర్భంగా తమిళిసై పేర్కొన్నారు. 

లద్దాఖ్‌లో చైనాతో ఆరు వారాలుగా నెలకొన్న సరిహద్దు ప్రతిష్టంభన సోమవారం హింసాత్మకంగా మారిన విషయం తెలిసిందే. ఇరు దేశాలకు చెందిన సైనికులు భౌతిక ఘర్షణకు దిగారు. ఈ ఘర్షణలో తెలంగాణలోని సూర్యాపేటకు చెందిన సైనికాధికారి కర్నల్‌ సంతోష్‌ కుమార్‌ వీరమరణం పొందారు. ఆయనతోపాటు మరో 19 మంది భారత సైనికులు అమరులయ్యారు. ఈ ఘర్షణలో చైనా వైపు కూడా భారీ ప్రాణనష్టం జరిగినట్లు సమాచారం.