దొంగిలించారు.. ఏడ్చాడని తిరిగిచ్చారు!

కరాచీ‌: దొంగలకు అసలు దయ, కరుణ అంటూ ఉండవు. సమయ సందర్భాలతో పనిలేకుండా సదరు మనిషి ఎలాంటి పరిస్థితుల్లో ఉన్నప్పటికీ దొంగతనం చేస్తూ సమజానికి తలవంపులు తెస్తుంటారు. కానీ మాలో సైతం మానవత్వం ఉందని నిరూపించారు దొంగలు. వివరాల్లోకి వెళితే.. పాకిస్థాన్‌లోని కరాచీలో ఓ డెలివరీ బాయ్‌ను ఇద్దరు దొంగలు అనుసరించారు. అతను ఓ చోట తన ద్విచక్రవాహనాన్ని ఆపి డెలివరీ చేసి వచ్చాడు. అప్పటికే ద్విచక్రవాహనం దగ్గరికి వచ్చిన ఆ దొంగలు ఆ డెలివరి బాయ్‌ నుంచి విలువైన వస్తువులను లాక్కున్నారు. ఈ ఘటనతో షాక్‌కు గురైన సదరు వ్యక్తి కన్నీళ్ల పర్యంతం అయ్యాడు. ఈ ఘటనతో చలించిపోయిన దొంగలు ఆ వస్తువులను అతనికి తిరిగి ఇచ్చేశారు. అనంతరం డెలివరీ బాయ్‌ని ఆలింగనం చేసుకొని కరచాలనం కూడా చేశారు. దీనికి సంబంధించిన వీడియో సామాజిక మాధ్యమాల్లో తెగ వైరల్‌ అయ్యింది. ఈ వీడియో చూసిన 2.8 లక్షల మంది నెటిజన్లు ఫిదా అయ్యారు. దీంతో దొంగలకు కూడా అప్పుడప్పుడు జాలి, దయ, కరుణ ఉంటుందంటూ నెటిజన్ల కామెంట్లు పెడుతున్నారు. ‘దయతో కూడిన ఈ చిన్న పని కన్నీళ్లను పెట్టించింది. మనం నివసిస్తున్న ఈ విషపూరిత వాతావరణం గురించి ఈ సంఘటన మనకు చాలా విషయాలను తెలియజేస్తుంది. మానవత్వమే మనల్ని కాపాడుతుంది. దయతో వ్యవహరించండి’ ఓ నెటిజన్‌  పేర్కొన్నారు. మంచి పని చేయడానికి ఎప్పుడూ సంకోచించకూడదు అనడానికి ఇదో పాఠం అని మరో నెటిజన్‌ పేర్కొన్నాడు.