57 బాలిక‌ల‌కు క‌రోనా.. ఐదుగురు గ‌ర్భిణులు

కాన్పూర్‌: ఉత్త‌ర్ప్ర‌దేశ్‌లోని కాన్పూర్‌ ప్ర‌భుత్వ బాలిక‌ల ఆశ్ర‌య గృహంలో 57 మంది బాలిక‌ల‌కు క‌రోనా సోకింది. వీరిలో ఐదుగురు గ‌ర్భ‌వ‌తులు. ఒకరు హెచ్ఐవీ బాధితురాలు. ఈ సమాచారం నిజమేనని అధికారులు ధ్రువీక‌రించ‌డంతో స్థానికంగా క‌ల‌వ‌రం మొద‌లైంది.

ప్ర‌స్తుతం ఈ ఆశ్ర‌య గృహాన్ని మూసేసిన ప్ర‌భుత్వం సంబంధిత సిబ్బందిని క్వారంటైన్‌కు త‌ర‌లించింది. ఈ గృహంలో ఏడుగురు గ‌ర్భిణులు ఉన్నార‌ని అందులో ఐదుగురికి కొవిడ్‌-19 పాజిటివ్ అని కాన్పూర్ జిల్లా మెజిస్ట్రేట్ బ్ర‌హ్మదేవ్ రామ్ తివారీ ఆదివారం సాయంత్రం మీడియాతో వెల్ల‌డించారు. ఆశ్ర‌యం పొంద‌క ముందునుంచే ఈ బాలిక‌లు గ‌ర్భ‌వ‌తుల‌ని ఆయ‌న స్ప‌ష్టం చేశారు. పోక్సో చ‌ట్టం కింద ద‌ర్యాప్తు చేప‌ట్టామ‌ని వివ‌రించారు. జిల్లా ఎస్పీ సైతం ఇదే విష‌యాన్ని వెల్ల‌డించారు. ఈ గృహంలోకి పురుషులు వ‌చ్చే అవ‌కాశ‌మే లేద‌ని స్ప‌ష్టం చేశారు. 

ఆశ్ర‌య గృహంలోని బాలిక‌లు కొన్ని రోజుల ముందు నుంచి కొవిడ్‌-19 ల‌క్ష‌ణాల‌తో బాధ‌ప‌డుతున్నారు. శుక్ర‌వారం ఈ విష‌యాన్ని స్థానిక అధికారులు వైద్య‌శాఖ‌కు తెలియ‌జేశారు. ప‌రీక్ష‌లు నిర్వ‌హించ‌డంతో వైర‌స్ సోకింద‌ని తేలింది. గ‌ర్భిణుల్లో ముగ్గురిని రామ వైద్య క‌ళాశాల‌, ఇద్ద‌రిని హ‌లెట్ ఆస్ప‌త్రిలో చేర్చారు.