కర్నల్‌ కుటుంబానికి సీఎం కేసీఆర్‌ పరామర్శ

సూర్యాపేట: వీరమరణం పొందిన కర్నల్‌ బిక్కుమళ్ల సంతోష్‌ బాబు కుటుంబసభ్యులను తెలంగాణ ముఖ్యమంత్రి కేసీఆర్‌ పరామర్శించారు. కర్నల్‌ సంతోష్‌బాబు చిత్రపటానికి సీఎం కేసీఆర్‌ పుష్పాంజలి ఘటించి నివాళులర్పించారు. ఇటీవల భారత్‌ - చైనా సరిహద్దు వద్ద గల్వాన్‌ ప్రాంతంలో జరిగిన ఘర్షణలో కర్నల్‌ సంతోష్‌ బాబు వీరమరణం పొందిన విషయం తెలిసిందే. సంతోష్ భార్య సంతోషీకి గ్రూప్-1 ఉద్యోగం నియామక పత్రాన్ని ముఖ్యమంత్రి స్వయంగా అందజేశారు. హైదరాబాద్‌లోని బంజారాహిల్స్‌లో 711 గజాల స్థలానికి సంబంధించిన పత్రాన్ని అందించారు. సంతోష్ భార్యకు రూ.నాలుగు కోట్ల చెక్కు, తల్లిదండ్రులకు రూ.కోటి చెక్కును ముఖ్యమంత్రి అందించారు.

దేశరక్షణ కోసం సంతోష్ ప్రాణ త్యాగం చేశారని ముఖ్యమంత్రి కొనియాడారు. సంతోష్ మరణం తనను ఎంతగానో కలచివేసిందని ముఖ్యమంత్రి చెప్పారు. సంతోష్ కుటుంబానికి ప్రభుత్వం ఎల్లవేళ్లలా అండగా ఉంటుందని సీఎం హామీ ఇచ్చారు. ఎప్పుడు ఏ అవసరం వచ్చినా తమను సంప్రదించాలని చెప్పారు. సంతోష్ కుటుంబ బాగోగులు చూసుకోవాలని మంత్రి జగదీశ్ రెడ్డిని ముఖ్యమంత్రి కోరారు.