TS: రీకౌంటింగ్‌.. రీవెరిఫికేషన్‌ గడువు పెంపు

ఇంటర్‌ బోర్డు నిర్ణయం

హైదరాబాద్‌: తెలంగాణలో ఇంటర్‌ రీకౌంటింగ్‌, రీవెరిఫికేషన్‌ విషయంలో ఇంటర్‌ బోర్డు విద్యార్థులకు ఉపశమనం ఇచ్చింది. రీకౌంటింగ్‌, రీవెరిఫికేషన్‌ గడువును ఈ నెల 30 వరకు పొడిగిస్తూ నిర్ణయం తీసుకుంది. గత గురువారం తెలంగాణ ఇంటర్‌ పరీక్షల ఫలితాలు వచ్చిన విషయం తెలిసిందే. రెండు సంవత్సరాలకు కలిసి 9.50 లక్షల మంది విద్యార్థులు పరీక్షలు రాశారు.

ఇంటర్‌ తొలి సంవత్సర ఫలితాల్లో 2,88,383 మంది విద్యార్థులు ఉత్తీర్ణత సాధించారు. మొత్తం 60.01 శాతం మంది విద్యార్థులు ఉత్తీర్ణత సాధించారు. తొలి సంవత్సర ఫలితాల్లో బాలికలదే పైచేయి సాధించారు. 67.47 శాతం బాలికలు ఉత్తీర్ణత సాధించగా, బాలురు 52.30 శాతం మంది పాసయ్యారు. రెండో సంవత్సర ఫలితాల్లో 2,83,462 మంది ఉత్తీర్ణత పొందగా, మొత్తం 68.86 శాతం మంది విద్యార్థులు ఉత్తీర్ణత సాధించారు.