పోలీసు విచారణకు పీవీపీ గైర్హాజరు

హైదరాబాద్‌ : తమ వద్ద నమోదైన ఓ కేసుకు సంబంధించి విచారణకు హాజరు కావాలని బంజారాహిల్స్‌ పోలీసులు నోటీసు ఇచ్చినా ఆంధ్రప్రదేశ్‌కు చెందిన వైకాపా నేత పొట్లూరి వరప్రసాద్‌(పీవీపీ) హాజరు కాలేదు. దీంతో ఆయన కదలికలపై నిఘా పెట్టిన పోలీసులు ఇంట్లోనే ఉన్నట్లు గుర్తించారు. సిబ్బందిని ఫిలింనగర్‌లోని నివాసం వద్ద ఉంచారు. బంజారాహిల్స్‌ రోడ్‌ నంబరు 14లో నిర్మించిన విల్లాల్లోని ఒకదాన్ని ఏడాదిన్నర క్రితం పీవీపీ.. విక్రమ్‌ కైలాశ్‌కు విక్రయించారు. ఇంటి పైభాగంలో కైలాశ్‌ నిర్మాణాలు చేపడుతుండగా పీవీపీతోపాటు 15 మంది అనుచరులు అక్కడికి వెళ్లి పనులను నిలిపివేయించారు. కేసు నమోదు చేసిన పోలీసులు పీవీపీని బుధవారం ఉదయం అదుపులోకి తీసుకొని రాత్రి 10.30 గంటల వరకు విచారించారు. మరుసటి రోజు కూడా విచారణకు రావాలని నోటీసు జారీ చేసినా ఆయన వెళ్లలేదు.