‘కరోనా నియంత్రణలో తెరాస సర్కార్ నిర్లక్ష్యం’

 కేసీఆర్‌ వైఖరిపై మండిపడ్డ విజయశాంతి

హైదరాబాద్‌: కరోనా వైరస్‌ వ్యాప్తి నియంత్రణలో తెరాస ప్రభుత్వం పూర్తిగా నిర్లక్ష్యం వహిస్తోందని పీసీసీ ప్రచార కమిటీ ఛైర్‌ పర్సన్‌ విజయశాంతి మండిపడ్డారు. రాష్ట్రంలో కరోనా కేసుల ఉద్ధృతిపై ఆమె స్పందించారు. తెలంగాణ సీఎం కేసీఆర్ నియంతృత్వ వైఖరితో ప్రాణాలను సైతం తెగించి సేవలందిస్తున్న వైద్య సిబ్బంది అవమానాల పాలవుతున్నారని ఆమె ఆవేదన వ్యక్తం చేశారు. పోస్టింగ్‌లు, అనుభవం, జీతాల విషయంలో అన్యాయాన్ని ప్రశ్నిస్తూ రోడ్డెక్కిన నర్సులకు జవాబు చెప్పలేక తెరాస సర్కార్‌ నీళ్లు నములుతోందన్నారు. ఆర్టీసీ సిబ్బందికి జూన్‌ నెల అందిన జీతాలు చూస్తే వారికి ఎలాంటి అన్యాయం జరిగిందో తెలుస్తుందని విజయశాంతి అన్నారు. ప్రజలకు అందుబాటులో ఉండాల్సిన సీఎం కేసీఆర్ ఎప్పుడు ఫాం హౌస్‌లో ఉంటారో.. ఎప్పుడు ప్రగతి భవన్‌లో దర్శనమిస్తారో తెలియని పరిస్థితి నెలకొందని విజయశాంతి ఆగ్రహం వ్యక్తం చేశారు.