హిందూపురాన్ని జిల్లా కేంద్రం చేయండి:బాలకృష్ణ

ఏపీ సీఎం జగన్‌, రాష్ట్ర సీఎస్‌కు బాలకృష్ణ లేఖ

అనంతపురం: కొత్త జిల్లాల ఏర్పాటులో హిందూపురం పట్టణాన్ని జిల్లా కేంద్రంగా చేయాలని కోరుతూ తెదేపా ఎమ్మెల్యే బాలకృష్ణ ఏపీ సీఎం జగన్‌, ప్రభుత్వ ప్రధాన కార్యదర్శి నీలం సాహ్నీకి లేఖ రాశారు. హిందూపురాన్ని జిల్లా కేంద్రంగా చేస్తే నియోజకవర్గంలోని అన్ని ప్రాంతాలకు అందుబాటులో ఉంటుందని లేఖలో ఆయన పేర్కొన్నారు. ప్రస్తుత జిల్లా కేంద్రమైన అనంతపురం హిందూపురానికి 110 కిలో మీటర్ల దూరంలో ఉందని గుర్తు చేశారు. హిందూపురం నియోజకవర్గం మాల్గురులో వైద్య కళాశాల ఏర్పాటు చేయాలని మరో లేఖలో బాలకృష్ణ కోరారు. దీని కోసం సరిపడ భూమి అందుబాటులో ఉందని లేఖలో ప్రస్తావించారు. మాల్గురులో వైద్య కళాశాల ఏర్పాటు రాయలసీమ విద్యార్థులకు ఎంతో ఉపయోగకరంగా ఉంటుందని లేఖలో బాలకృష్ణ పేర్కొన్నారు.