కరోనాకు ‘కోటింగ్‌’ పడుద్ది

టొరంటో: కరోనా వైరస్‌ వస్తువుల ఉపరితలాలపైన 24 గంటలవరకూ జీవించి ఉంటుందని పరిశోధనలు చెబుతున్నాయి. దీంతో తలుపు గడియలు, స్విచ్‌లు, సెల్‌ ఫోన్లు.. ఇలా ఏ వస్తువును పట్టుకోవాలన్నా భయపడే పరిస్థితి. అయితే ఆ భయానికి ‘కోటింగ్‌’తో టాటా చెప్పే దిశగా పరిశోధన జరుగుతోంది. కరోనా వైరస్‌ చేరితే వెంటనే దాన్ని చంపేసేలా వస్తువులకు పూసే యాంటీ వైరల్‌ పూతను(కోటింగ్‌) తయారు చేసే దిశగా కెనెడాలోని వాటర్‌లూ ఇన్‌స్టిట్యూట్‌ ఫర్‌ నానో టెక్నాలజీ(విన్‌) ప్రయోగాలు చేస్తోంది. ఈ ప్రాజెక్టుకు నాయకత్వం వహిస్తున్న ప్రొఫెసర్‌ సుశాంత మిత్ర దీని గురించి వివరిస్తూ ‘‘కరోనాపై ముందుండి పోరాడుతున్న సిబ్బందికి, సాధారణ ప్రజలకూ రక్షణ కల్పించేలా, సామూహిక వ్యాప్తిని అరికట్టేలా ఈ కోటింగ్‌ పనిచేయనుంది’’ అని తెలిపారు.