Gannavaram Airport: గన్నవరంలో బోయింగ్‌ 777 ల్యాండింగ్‌ విజయవంతం

అమరావతి: గన్నవరం విమానాశ్రయంలో బుధవారం రాత్రి బోయింగ్‌ 777 విమానం విజయవంతంగా దిగింది. ఎయిర్‌ ఇండియా వన్‌గా పిలిచే ఈ విమాన సర్వీసును రాష్ట్రపతి, ఉపరాష్ట్రపతి, ప్రధాన మంత్రి విదేశీ పర్యటనలకు వినియోగిస్తుంటారు. దేశంలోని వివిధ విమానాశ్రయాల్లో ఈ విమానం దిగడానికి ఉన్న అవకాశాలను పరిశీలిస్తున్నారు. గత నెలలో గన్నవరం విమానాశ్రయాన్ని అధికారులు పరిశీలించారు. ఇక్కడ కొత్తగా నిర్మించిన రన్‌వేను జులై నుంచి అందుబాటులోకి తీసుకొచ్చారు. గతంలో ఉన్న రన్‌వే 7500 అడుగుల విస్తీర్ణంలో ఉండగా.. తాజాగా 11,023 అడుగులకు పెరిగింది. దీంతో భారీ విమాన సర్వీసులు దిగేందుకు వీలు కలిగింది. ప్రస్తుతం ఎయిర్‌బస్‌ ఎ380, ఎ340, బోయింగ్‌ 747, 777 లాంటి కోడ్‌ఈ స్థాయి విమానాలు రాకపోకలు సాగించొచ్చు. ఈ నేపథ్యంలోనే బోయింగ్‌ 777 విమానాన్ని విజయవంతంగా ల్యాండింగ్‌ చేసి, తిరిగి టేకాఫ్‌ చేసినట్టు అధికారులు తెలిపారు.