Maharashtra: సంజయ్, సుప్రియాల నృత్యం అదుర్స్‌

మహారాష్ట్రకు చెందిన ఎంపీలు సంజయ్‌ రౌత్, సుప్రియా సూలేలు చేసిన నృత్యం ప్రస్తుతం ఇంటర్నెట్‌లో విపరీతంగా చక్కర్లు కొడుతోంది. శివసేనకు చెందిన సంజయ్‌ కుమార్తె పూర్వాన్షీ రౌత్‌ వివాహం ఠాణె జిల్లా కలెక్టర్‌ రాజేశ్‌ నర్వేకర్‌ కుమారుడు మల్హార్‌ నర్వేకర్‌తో సోమవారం ముంబయిలోని ఓ స్టార్‌ హోటల్‌లో జరిగింది. వివాహ వేడుకలో భాగంగా నిర్వహించిన సంగీత్‌ కార్యక్రమానికి వివిధ రంగాల ప్రముఖులు విచ్చేశారు. ఈ సందర్భంగా సంజయ్‌ రౌత్‌తో కలిసి ఎన్‌సీపీ ఎంపీ సుప్రియా సూలే కొద్దిసేపు నృత్యం చేసి అలరించారు. దీనిపై భాజపా నాయకుడు రాధాకృష్ణ విఖేపాటిల్‌ విమర్శలు గుప్పించారు. ‘‘రాష్ట్రంలో ఎస్టీ కార్మికులు, రైతులు ఆత్మహత్యలు చేసుకుంటున్నారు. మరోవైపు, మీరేమో నృత్యాలు చేస్తున్నారు’’ అని మండిపడ్డారు.