Sundar Naidu Uppalapati: సుందరనాయుడు కుటుంబాన్ని పరామర్శించిన చంద్రబాబు

చిత్తూరు: ఇటీవల కన్నుమూసిన బాలాజీ హేచరీస్‌ అధినేత, ప్రముఖ పారిశ్రామికవేత్త డాక్టర్ ఉప్పలపాటి సుందరనాయుడి శుభస్వీకరణ కార్యక్రమంలో తెదేపా అధినేత చంద్రబాబు పాల్గొన్నారు. చిత్తూరు రెడ్డిగుంటలో సుందరనాయుడు నివాసంలో ఆయన చిత్రపటం వద్ద నివాళులర్పించారు. ఈ సందర్భంగా చంద్రబాబు మీడియాతో మాట్లాడుతూ తెలుగు రాష్ట్రాల్లో పౌల్ట్రీ రైతుల కోసం సుందరనాయుడు ఎంతో శ్రమించారని గుర్తుచేసుకున్నారు. ఎందరికో ఆయన స్ఫూర్తిగా నిలిచారన్నారు. పౌల్ట్రీ రంగంలో సుందరనాయుడు ఒక దారి చూపించారని.. దాన్ని కొనసాగించాల్సిన అవసరం ఉందని చంద్రబాబు అభిప్రాయపడ్డారు. పౌల్ట్రీ రైతులకు తెదేపా అండగా ఉంటుందని చెప్పారు.

ఇటీవల సుందరనాయుడు హైదరాబాద్‌లోని ఓ ప్రైవేటు ఆసుపత్రిలో హృద్రోగ సమస్యకు చికిత్స పొందుతూ తుదిశ్వాస విడిచిన విషయం తెలిసిందే. పశువైద్యుడిగా వృత్తిని ప్రారంభించిన ఆయన... పౌల్ట్రీ పరిశ్రమలో ప్రవేశించి ఆ రంగం అభివృద్ధికి అపార కృషిచేశారు. ఉమ్మడి ఆంధ్రప్రదేశ్‌లో తొలితరం పారిశ్రామికవేత్తగా గుర్తింపు పొందారు. ఎంతోమంది యువతను పౌల్ట్రీ రంగంవైపు వైపు నడిపించి వారి జీవితాల్లో వెలుగులు నింపారు.