Hyderabad News: బాలకృష్ణ ఇంటి గేటు వైపు దూసుకెళ్లిన కారు

జూబ్లీహిల్స్, న్యూస్‌టుడే: సినీ నటుడు బాలకృష్ణ ఇంటి గేటు వైపు కారు దూసుకెళ్లిన ఘటన ఇది. ఫిలింనగర్‌ వైపు నుంచి టీఎస్‌ 10ఈయూ 3047 నంబరు గల థార్‌ వాహనం జూబ్లీహిల్స్‌ చెక్‌పోస్టు వైపు వెళ్తుంది. రోడ్‌ నంబరు 45 కూడలి దాటుతుండగా వెనుక నుంచి వచ్చిన అంబులెన్స్‌కు దారిచ్చే క్రమంలో ఒక్కసారిగా కూడలి పక్కనే ఉన్న సినీనటుడు బాలకృష్ణ ఇంటివైపు వాహనం దూసుకెళ్లి పాదచారుల బాటపైకి ఎక్కి పక్కనే ఉన్న ట్రీగార్డును ఢీకొని నిలిచిపోయింది. అక్కడే ఉన్న ట్రాఫిక్‌ పోలీసులు సంఘటనా స్థలానికి చేరుకొని వాహనం  నడుపుతున్న యువతికి శ్వాస విశ్లేషణ పరీక్ష చేశారు. మద్యం తాగలేదని గుర్తించారు. వాహనాన్ని అక్కడి నుంచి తొలగించారు.      సంఘటనలో ఎవరికి ఎలాంటి గాయాలు కాలేదు.