అదిగో చిరుత.. కాదు జంగుపిల్లి

అడవిలో తిరిగే జంగుపిల్లి

బాపట్ల, న్యూస్‌టుడే:  సూర్యలంక అటవీ భూముల్లో చిరుత పులి సంచరిస్తోందంటూ స్థానికులు ఆందోళన చెందుతున్నారు. ఆదర్శనగర్‌ సమీపంలో నేచర్‌ క్యాంప్‌ వద్ద, వాయుసేన కేంద్రం లోపల శని, ఆదివారాల్లో రాత్రి సమయంలో చిరుత సంచారాన్ని ప్రత్యక్షంగా చూశామంటూ వాయుసేన కేంద్రం అధికారులు అటవీశాఖ అధికారులకు సోమవారం సమాచారం ఇచ్చారు. కలెక్టరేట్లో సోమవారం స్పందన కార్యక్రమం సందర్భంగా అధికారులతో నిర్వహించిన సమావేశంలో సూర్యలంక అటవీ ప్రాంతంలో చిరుత తిరుగుతోందని సమాచారం వచ్చిందని అప్రమత్తంగా ఉండాలంటూ అధికారులకు కలెక్టర్‌ సూచించారు. వాయుసేన కేంద్రం లోపల చిరుత కనపడినట్లుగా తనిఖీ సిబ్బందికి ఎలాంటి ఆధారం లేదు. సీసీ కెమేరాల్లోనూ ఎలాంటి జాడ లేదు.
‘సూర్యలంక అటవీ భూముల్లో చిరుత పులుల సంచారానికి అవకాశం లేదు. ఈ ప్రాంతంలోని అడవుల్లో జంగు పిల్లలు ఎక్కువగా సంచరిస్తున్నాయి.’ చేపలు, కుందేళ్లు తింటూ బాగా బలిష్ఠంగా పెరుగుతాయి. ప్రస్తుతానికి చిరుత సంచారానికి సంబంధించి ఎలాంటి ఆధారాలు లేవు.’ అని డీఎఫ్‌ఓ భీమయ్య స్పష్టం చేశారు.