Google: గూగుల్‌లో తప్పులు కనిపెట్టినందుకు రూ.66 కోట్లు!

కొందరికి ఎదుటివారిలో తప్పులను వెతకడం అలవాటు. అమన్‌ పాండేకి మాత్రం వెబ్‌సైట్లు, యాప్‌లలో ఉండే తప్పులను వెతికిపట్టుకోవడం సరదా. అదే అతణ్ని కోటీశ్వరుణ్ని చేసింది. గూగుల్‌లో 300 బగ్‌లను కనిపెట్టినందుకు ఆ సంస్థ అతడికి రూ.66 కోట్లు ఇచ్చింది. ఉత్తరాఖండ్‌లో జన్మించిన అమన్‌ పాండే.. మధ్యప్రదేశ్‌లోని భోపాల్‌ ఎన్‌ఐటీలో బీటెక్‌ చేశాడు. బగ్స్‌ మిర్రర్‌ అనే సంస్థను ప్రారంభించి 15 మంది ఉద్యోగులను నియమించుకున్నాడు. గతేడాది గూగుల్‌లో ఉన్న బగ్‌లను కనిపెట్టి సమాచారమివ్వడానికి ఆ సంస్థ నుంచి ఓ ప్రాజెక్టు తీసుకున్నాడు. ఒక్క ఏడాదిలోనే 300 తప్పులను కనిపెట్టి రూ.66 కోట్లు అందుకున్నాడు. యాపిల్, శాంసంగ్‌ కూడా తన క్లయింట్లేనని చెప్పాడు అమన్‌.