పోలవరం ప్రాజెక్టు స్పీల్‌ వేలోకి వరద నీరు

పోలవరం: ఎగువ రాష్ట్రాల్లో కురుస్తున్న భారీ వర్షాలతో గోదావరి నదిలో వరద ఉద్ధృతి పెరుగుతోంది. పశ్చిమగోదావరి జిల్లాలోని పోలవరం ప్రాజెక్టు వద్ద వరద ప్రవాహం పెరగడంతో దాని ప్రభావం స్పిల్‌ ఛానెల్‌పై పడింది. స్పిల్‌ ఛానెల్‌ ఎడమ గట్టుకు గండిపడి నీరు లోపలికి చేరుతోంది. 

ప్రాజెక్టులో స్పిల్‌ వే పనులకు ఎలాంటి అంతరాయం కలగకుండా జలవనరుల శాఖ అధికారులు చర్యలు చేపట్టారు. స్పిల్‌ వే చుట్టూ ఉన్న గట్టును మరింత పటిష్ఠం చేశారు. వరద మరింత పెరిగినప్పటికీ స్పిల్‌ వే పనులకు ఆటంకం కలగకుండా ఇంజినీర్లు, గుత్తేదారులు జాగ్రత్తలు తీసుకుంటున్నారు. ప్రస్తుతం స్పిల్‌వే పై గడ్డర్ల అమరిక పనులు మాత్రమే జరుగుతున్నాయి. పోలవరం మండలంలోని కొత్తూరు కడెమ్మ వంతెనపైకి వరదనీరు చేరింది. దీంతో మండలంలోని 9 గ్రామాలకు రాకపోకలు నిలిచిపోయాయి. మరో వైపు ఖమ్మం జిల్లా భద్రాచలం వద్ద గోదావరిలో నీటిమట్టం పెరిగింది. ఇవాళ ఉదయం భద్రాచలం వద్ద నీటిమట్టం 32.7 అడుగులకు చేరిందని అధికారులు వెల్లడించారు.