KTR: రానున్న పదేళ్లలో 15 లక్షల మందికి ఉపాధి: కేటీఆర్‌

హైదరాబాద్‌: ప్రపంచ ప్రఖ్యాత ఎలక్ట్రానిక్స్‌ దిగ్గజ సంస్థ ఫాక్స్‌కాన్‌ తమ పెట్టుబడులు పెట్టేందుకు తెలంగాణను ఎంచుకున్నందుకు ఆనందంగా ఉందని రాష్ట్ర ఐటీ, పరిశ్రమలశాఖ మంత్రి కేటీఆర్‌ అన్నారు. హైదరాబాద్‌ శివారు కొంగరకలాన్‌లో ఫాక్స్‌కాన్‌ పరిశ్రమకు కేటీఆర్‌ భూమిపూజ చేశారు. ఈ సందర్భంగా మంత్రి మాట్లాడారు.

‘‘తొమ్మిదేళ్లుగా రాష్ట్రం ప్రగతి పథంలో పరుగులు పెడుతోంది. ఐటీ రంగంలో తెలంగాణ రెండో స్థానంలో ఉంది. దేశంలోని ఐటీ ఉద్యోగాల్లో ప్రతి మూడింట్లో ఒక ఉద్యోగం మనదే. మరో పదేళ్లలో 15 లక్షల మందికి ఉపాధి అవకాశాలు కల్పిస్తాం. ఒప్పందం ప్రకారం రెండున్నర నెలల్లోనే ఫాక్స్‌కాన్‌ పరిశ్రమకు సంబంధించిన శంకుస్థాపన పూర్తి చేశాం. సంస్థకు అన్ని రకాలుగా అండగా ఉంటాం. ఏడాదిలోగా పాక్స్‌కాన్‌ పరిశ్రమ పూర్తి కావాలని కోరుకుంటున్నాం. ఈ కంపెనీలో మొదటి దశలో 25వేల ఉద్యోగాలు లభిస్తాయి. యువత కోసం ప్రత్యేక శిక్షణా కేంద్రాలు ఏర్పాటు చేస్తాం’’ అని కేటీఆర్‌ తెలిపారు. కార్యక్రమంలో ఆయనతో పాటు మంత్రి సబితా ఇంద్రారెడ్డి, ఫాక్స్‌కాన్‌ ఛైర్మన్‌ యాంగ్‌ లియూ పాల్గొన్నారు.

కొంగరకలాన్‌లో రూ.1,655 కోట్ల పెట్టుబడితో ఈ సంస్థను ఏర్పాటు చేస్తున్నారు. ఈ నిర్మాణం పూర్తయితే సుమారు 35 వేల మందికి పైగా స్థానికులకు ఉద్యోగ, ఉపాధి అవకాశాలు లభిస్తాయని సంస్థ ప్రతినిధులు గతంలోనే ప్రకటించారు. సంస్థ ఏర్పాటుకు రాష్ట్ర ప్రభుత్వం 196 ఎకరాల భూమిని కేటాయించింది.