Cafe: ప్లాస్టిక్‌ వ్యర్థాలు ఇవ్వండి.. రుచికరమైన భోజనం అందిస్తాం.. ఓ కేఫ్‌ వినూత్న ప్రకటన

ఇంటర్నెట్‌ డెస్క్‌: గుజరాత్‌లోని ఓ కేఫ్‌ వినూత్న ప్రకటన ప్రజలను విశేషంగా ఆకట్టుకుంటోంది. ప్లాస్టిక్‌ వ్యర్థాలు అందజేస్తే.. రుచికరమైన భోజనం అందిస్తామంటూ ప్రకటించి ప్రజల దృష్టిని ఆకర్షిస్తోంది. గుజరాత్‌లోని జునాగఢ్‌కు చెందిన ‘నేచురల్‌ ప్లాస్టిక్‌ కేఫ్‌’ ప్రకటన వైరల్‌గా మారింది. జులై 1నుంచి పలు ప్లాస్టిక్‌ వస్తువులపై కేంద్రం నిషేధం విధించిన నేపథ్యంలో కేఫ్‌ ఈ తాజా ప్రకటన చేయడం విశేషం. ఆహార పదార్థాలను కొనుగోలు చేసేసమయంలో వినియోగదారులు బిల్లును డబ్బు రూపంలో చెల్లించేబదులు ప్లాస్టిక్‌ వర్థాలను ఇచ్చినా.. స్వీకరిస్తామంటూ కేఫ్‌ తెలిపింది.

నేచురల్‌ ప్లాస్టిక్‌ కేఫ్‌ను సర్వోదయ సాక్షి సంఘం అనే మహిళల బృందం నిర్వహించడం విశేషం. ప్లాస్టిక్‌ వ్యర్థాలను తీసుకొని వాటికి బదులుగా.. సంప్రదాయ గుజరాతీ వంటకాలను అందిస్తున్నారు. సెవ్ టమోటా, బైంగన్ బర్తా, బజ్రా రోట్లా వంటి విభిన్న వంటకాలు ఈ జాబితాలో ఉన్నాయి. గులాబీ, అత్తి పండ్లు, బెల్ ఆకులు, తమలపాకుతో చేసిన కొన్ని వంటకాలను కూడా అందిస్తున్నారు. ఈ కేఫ్‌ ప్రకటనను కలెక్టర్‌ రుచిత్‌ రాజ్‌ తన ట్విటర్‌ ఖాతాలో పంచుకోగా.. కేఫ్‌ నిర్ణయంపై నెటిజన్లు ప్రశంసలు కురిపిస్తున్నారు. ఇదో గొప్ప ముందడుగని కొనియాడుతున్నారు.

ఒకసారి వాడిపారేసే ప్లాస్టిక్‌ వస్తువులపై జులై 1 నుంచి దేశవ్యాప్తంగా నిషేధం అమల్లోకి వచ్చింది. ముఖ్యంగా తక్కువ పరిమాణం కలిగిన ఒకేసారి వాడిపారేసే ప్లాస్టిక్‌ వస్తువులను తయారు చేయడం, దిగుమతి చేసుకోవడం, నిల్వ ఉంచుకోవడం, సరఫరా, అమ్మకంతోపాటు వినియోగాన్ని కూడా పూర్తిగా నిషేధిస్తున్నట్లు కేంద్రం స్పష్టం చేసింది. ఇందుకు సంబంధించి నిషేధిత జాబితాలో ఏయే వస్తువులు ఉన్నాయో తెలియజేస్తూ ఓ ప్రకటన జారీ చేసింది. ఇయర్‌బడ్స్‌, ప్లాస్టిక్‌ జెండాలు, అలంకరణ కోసం వాడే థర్మోకోల్‌ తదితర వస్తువులు ఈ జాబితాలో ఉన్నాయి.