బొమ్మ తుపాకీ కాదు.. నిజమైందే!

ఇంటర్నెట్‌డెస్క్‌: పైఫొటోలో కనిపిస్తున్న తుపాకీ ఎలా ఉంది? రంగు రంగులతో భలే ఉంది అనుకుంటున్నారా? అది బొమ్మ తుపాకీ కాదండీ.. అసలైన తుపాకే. యూఎస్‌లోని ఉతాకు చెందిన కల్పర్‌ ప్రెసిషన్‌ అనే ఆయుధాల ఉత్పత్తి సంస్థ దీన్ని తయారు చేసింది. బ్లాక్‌-19 పేరుతో మార్కెట్లోకి తెచ్చిన ఈ తుపాకీ అచ్చం పిల్లలు ఆడుకునే లెగో బ్రిక్స్‌తో చేసిన బొమ్మ తుపాకీలా కనిపిస్తోంది. ఇటీవల ఈ తుపాకీల విక్రయం నెట్టింట్లో వైరల్‌ అయింది. దీంతో అధికారికంగా ఆయుధాలు కొనుగోలు చేసేవారితోపాటు.. నెటిజన్లు కంపెనీపై మండిపడుతున్నారు. మనుషుల ప్రాణాలు తీసే అసలైన తుపాకీని ఈ విధంగా తయారు చేస్తే పిల్లలు దీన్ని బొమ్మ తుపాకీ అనుకునే అవకాశముందని ఆక్షేపించారు. ఈ తుపాకీని ప్రమాదకరంగా తయారు చేశారని పెద్ద ఎత్తున విమర్శలు వచ్చాయి.

లెగో సంస్థ కూడా ఆ తుపాకీ తాము తయారు చేసే బ్రిక్స్‌లతో తయారు చేసినట్లుగా ఉందని అభ్యంతరం వ్యక్తం చేస్తూ కల్పర్‌ ప్రెసిషన్‌ కంపెనీకి నోటీసులు జారీ చేసింది. విమర్శలు, నోటీసులు రావడంతో ఆ కంపెనీ బొమ్మ తుపాకీలా కనిపించే బ్లాక్‌-19 తుపాకీల ఉత్పత్తిని నిలిపివేసింది. అయితే, క్షమాపణ చెప్పకపోవడం గమనార్హం. కస్టమర్లు తమకు నచ్చిన వస్తువును నచ్చిన విధంగా కస్టమైజ్‌ చేసుకునే హక్కు ఉందంటూ బొమ్మ తుపాకీ తయారీని సమర్థించుకునే ప్రయత్నం చేసింది.