Health News: మనిషిని కుప్పకూల్చే వడదెబ్బ

ఇంటర్నెట్‌డెస్క్‌ : చెట్టంత మనిషిని కూడా భానుడి ఉష్ణం కుప్పకూల్చేస్తుంది. శరీర ఉష్ణోగ్రతను నియంత్రించే వ్యవస్థను దెబ్బతీస్తుంది. ఎండాకాలం వచ్చిందంటే చిన్నాపెద్దా తేడా లేకుండా వడదెబ్బ బారిన పడిపోతారు. శరీరంలోని నీటిని పీల్చేసి శక్తీహీనులుగా మార్చే వడదెబ్బ నుంచి ఎలా రక్షణ పొందాలో తెలుసుకుందాం.

* తీవ్రమైన ఎండలు, వడగాలులతో సహజంగానే మన ఒంట్లోని బలం బయటకు పోతుంది. 

* తీక్షణమైన ఉష్ణోగ్రత కారణంగా కఫం ప్రకోపిస్తుంది. ఫలితంగా జఠరాగ్ని మందగిస్తుంది.

* ఎవరికైనా వడదెబ్బ తగిలినపుడు ఆ వ్యక్తిని చల్లని వాతావరణంలోకి తీసుకెళ్లాలి.

* ఒంటిపై దుస్తులను వదులుగా చేసి గాలి బాగా ఆడేలా చూడాలి.

* నీరు, ద్రవాహారాలను బాగా అందించాలి.

* ద్రవ ఆహారాలను ఒక్కొక్కటిగా కాకుండా మిశ్రమంగా ఇస్తే బాగుంటుంది.

* కొబ్బరినీరు, చెరుకు రసాలు, పెరుగు, మజ్జిగ, పళ్లరసాలు వడదెబ్బ నుంచి రక్షణ కల్పిస్తాయి.

* వేసవిలో విరివిగా లభించే మామిడి పూత వడదెబ్బకు చక్కని ఔషధం. మామిడి పూలు ఒక కిలో, మామిడికాయలు ఉడికించి తీసిన గుజ్జు ఒక కిలో, చక్కెర 2 కిలోలు తీసుకొని అన్నింటిని కలిపి సన్నటి మంటపై ఉడికించాలి. 

* ఈ మిశ్రమం పాకంగా మారే సమయంలో మిరియాల పొడి 10 గ్రాములు, సైంధవ లవణం 10 గ్రాములు పాకం దించే సమయంలో పోయాలి.

* శుభ్రమైన గాజు సీసాలో భద్రపరచాలి. కుండలోని చల్లని నీరు గ్లాసు తీసుకొని అందులో రెండు చెంచాల పానకం పోసుకొని తాగాలి.

* ప్రతి రోజు ఈ పానకం తాగడంతో ఉష్ణతాపం, కళ్లమంట కూడా తగ్గిపోతుంది. ఆకలి లేకపోవడం, నోరు ఎండిపోవడానికి కూడా చక్కని పరిష్కారం చూపుతుంది.