Trivikram: త్రివిక్రమ్‌ కారుకు ఫైన్‌ వేసిన పోలీసులు

హైదరాబాద్‌: దర్శకుడు త్రివిక్రమ్‌ కారుకు హైదరాబాద్‌ ట్రాఫిక్‌ పోలీసులు చలానా విధించారు. సోమవారం ఉదయం జూబ్లీహిల్స్‌ పరిసర ప్రాంతాల్లో తనిఖీలు చేసిన పోలీసులు.. అటుగా వెళ్తోన్న త్రివిక్రమ్‌ శ్రీనివాస్‌ కారుని ఆపారు. ఆయన కారుకు ఉన్న బ్లాక్‌ ఫిల్మ్‌ తొలగించి జరిమనా విధించారు. ఆ సమయంలో త్రివిక్రమ్‌ కారులోనే ఉన్నారు. వాహనాలకు ఉన్న బ్లాక్‌ ఫిల్మ్‌లను తొలగించాలని కొన్నిరోజులుగా ట్రాఫిక్‌ పోలీసులు విస్తృతంగా ప్రచారం చేస్తున్నారు. అలా తొలగించని వారి వాహనాలకు జరిమానా విధిస్తున్నారు. ఈ క్రమంలోనే ఇటీవల మంచు మనోజ్‌, ఎన్టీఆర్‌, అల్లు అర్జున్‌, కల్యాణ్‌రామ్‌ కార్లకు ఉన్న బ్లాక్‌ ఫిల్మ్‌లను పోలీసులు తొలగించి ఫైన్‌ వేసిన సంగతి తెలిసిందే.