Sandeep Sandilya: హైదరాబాద్‌ సీపీ సందీప్ శాండిల్యకు అస్వస్థత

హైదరాబాద్‌: హైదరాబాద్‌ నగర పోలీసు కమిషనర్‌ (సీపీ) సందీప్ శాండిల్య (Sandeep Sandilya) అస్వస్థతకు గురయ్యారు. బషీర్‌బాగ్‌ పాత సీపీ కార్యాలయంలో ఉండగా సందీప్‌ శాండిల్య ఛాతీనొప్పితో ఇబ్బంది పడ్డారు. దీంతో ఆయనను అధికారులు హుటాహుటిన హైదర్‌గూడలోని అపోలో ఆస్పత్రికి తరలించారు. ప్రస్తుతం శాండిల్య ఆరోగ్య పరిస్థితి నిలకడగానే ఉందని వైద్యులు తెలిపారు. ఆస్పత్రిలో సందీప్‌ శాండిల్యను సీఐడీ చీఫ్‌ మహేశ్‌ భగవత్‌ పరామర్శించారు. తాను ఆరోగ్యంగానే ఉన్నానని సందీప్‌ శాండిల్య తెలిపారు. ఒకరోజు పర్యవేక్షణలో ఉండాలని వైద్యులు సూచించినట్లు పేర్కొన్నారు. మంగళవారం యథావిధిగా విధులకు హాజరవుతానని శాండిల్య వెల్లడించారు.