ICAI CA exam results: సీఏ ఫౌండేషన్‌ పరీక్ష ఫలితాల కోసం క్లిక్‌ చేయండి

దిల్లీ‌: గతేడాది డిసెంబర్‌లో జరిగిన ఛార్టెర్డ్‌ అకౌంటెంట్స్‌ (సీఏ) ఫౌండేషన్‌(ICAI CA Foundation) పరీక్షల ఫలితాలు విడుదలయ్యాయి. ఇన్‌స్టిట్యూట్‌ ఆఫ్‌ ఛార్టెర్డ్‌ అకౌంటెంట్స్‌ ఆఫ్‌ ఇండియా(ICAI) సంస్థ శుక్రవారం ఈ ఫలితాలను వెల్లడించింది. అభ్యర్థులు తమ అధికారిక వెబ్‌సైట్‌ icai.nic.inలో ఫలితాలను తెలుసుకోవచ్చని పేర్కొంది. ఫలితాలను తెలుసుకొనేందుకు ఆయా అభ్యర్థులు తమ ఆరు అంకెల రోల్‌ నంబర్‌తో పాటు రిజిస్ట్రేషన్‌ నంబర్‌ను ఎంటర్‌ చేయాల్సి ఉంటుంది. గతేడాది డిసెంబర్‌ 14 నుంచి 20వ తేదీల మధ్య ఈ పరీక్ష జరిగిన విషయం తెలిసిందే. 

మరోవైపు 2023 మే, జూన్‌ నెలల్లో జరిగే సీఏ ఫౌండేషన్‌, ఇంటర్మీడియట్‌, ఫైనల్‌ కోర్సుల పరీక్షల షెడ్యూల్‌ను ఐసీఏఐ ఇటీవలే ప్రకటించింది. సీఏ ఫౌండేషన్‌ కోర్సు పరీక్షలను జూన్‌ 24, 26, 28, 30 తేదీల్లో నిర్వహించనుండగా.. ఇంటర్మీడియట్‌ కోర్సులో గ్రూపు-1 పరీక్షలు మే 3, 6, 8, 10 తేదీల్లో;  గ్రూపు-2ను 12, 14, 16, 18 తేదీల్లో నిర్వహిస్తున్నట్టు పేర్కొంది. ఫైనల్‌ విద్యార్థులకు గ్రూపు-1ను మే 2, 4, 7, 9 తేదీల్లో, గ్రూపు-2ను మే 11, 13, 15, 17 తేదీల్లో జరపనుంది.