పక్షవాత రోగుల కోసం వినూత్న ఆవిష్కరణ!

గాంధీనగర్‌: గుజరాత్‌లోని గాంధీనగర్‌ ఐఐటీకి చెందిన మెకానికల్‌ విభాగానికి చెందిన బృందం ఓ వినూత్న ఆవిష్కరణకు రూపం పోసింది. మనిషికి పక్షవాతం లేదా ఇతర జబ్బు లక్షణాలు మొదలైనపుడు నరాల వ్యవస్థ దెబ్బతిని నడక, మాటతీరు, విషయాల్ని అర్థం చేసుకోవడంలో ఇబ్బందులు తలెత్తుతాయి. అలాంటి ఇబ్బందుల నుంచి మనిషిని తిరిగి సాధారణ స్థితికి ప్రేరేపించేలా చేసే రొబోటిక్‌ లెగ్‌ ఎక్సోస్కెలిటన్‌ అనే పరికరాన్ని రూపొందించారు. వినీత్‌ వశిష్ట అనే ప్రొఫెసర్‌ నేతృత్వంలో రూపొందించిన ఈ లెగ్‌ ఎక్సోస్కెలిటన్‌కు వారు ‘వియర్స్‌’ అని నామకరణం చేశారు. 

ఈ పరికరం గురించి ప్రొఫెసర్‌ వినీత్‌ మాట్లాడుతూ.. ‘‘సాధారణంగా పక్షవాతం వచ్చిన వారికి నరాల వ్యవస్థ దెబ్బతినడం వల్ల కదలికల్లో ఇబ్బందులు మొదలవుతాయి. నడవడానికి ఇబ్బంది పడుతుంటారు. అలాంటి వారి కోసమే లెగ్‌ ఎక్సోస్కెలిటన్‌ తయారు చేశాం. ఈ రొబోటిక్‌ పరికరాన్ని శరీరానికి బిగించడం ద్వారా.. మన శరీరంలోని కండరాల్ని కొంత బాహ్య శక్తి ద్వారా కదలికలకు ఉత్తేజపరుస్తాయి. దీన్ని ధరించి నడవడం ద్వారా మనిషి శరీర కదలికల్లో కొంతమేర అయినా సాధారణ స్థితిని తిరిగి పొందవచ్చు. ఇది చాలా తేలికగా ఉంటుంది. సులువుగా ధరించొచ్చు’’ అని తెలిపారు.