ఇన్నర్‌ రింగ్‌ రోడ్డు కేసు.. చంద్రబాబు బెయిల్‌ పిటిషన్‌పై విచారణ వాయిదా

అమరావతి: అమరావతి ఇన్నర్‌ రింగ్‌ రోడ్డు కేసులో తెదేపా అధినేత చంద్రబాబు బెయిల్‌ పిటిషన్‌పై హైకోర్టులో విచారణ వాయిదా పడింది. రాజధాని నగరానికి సంబంధించిన బృహత్ ప్రణాళిక డిజైనింగ్, ఇన్నర్ రింగ్ రోడ్డు, దాన్ని అనుసంధానించే రహదారుల అలైన్‌మెంట్‌ వ్యవహారంలో అక్రమాలు చోటు చేసుకున్నాయని వైకాపా ఎమ్మెల్యే ఆళ్ల రామకృష్ణారెడ్డి 2022 ఏప్రిల్ 27న ఇచ్చిన ఫిర్యాదు ఆధారంగా.. అదే ఏడాది మే 9న సీఐడీ పలువురిపై కేసు నమోదు చేసింది.

చంద్రబాబును మొదటి నిందితుడిగా సీఐడీ పేర్కొంది. ఈ కేసులో తనకు బెయిలు మంజూరు చేయాలని హైకోర్టులో చంద్రబాబు బెయిల్‌ పిటిషన్ వేశారు. కేసులోని ఇతర నిందితులకు బెయిల్‌ వచ్చిందని చంద్రబాబు తరఫున న్యాయవాదులు కోర్టు దృష్టికి తీసుకుకెళ్లారు. ఇరుపక్షాల వాదనలు విన్న న్యాయస్థానం తదుపరి విచారణ ఈ నెల 26వ తేదీకి వాయిదా వేసింది.