JEE Main 2023: ఇంకా 3రోజులే.. జేఈఈ మెయిన్‌ పరీక్షకు దరఖాస్తు చేశారా?

ఇంటర్నెట్‌ డెస్క్‌: దేశంలోని ప్రఖ్యాత విద్యా సంస్థల్లో ఇంజినీరింగ్‌ కోర్సుల్లో ప్రవేశాల కోసం నిర్వహించే జేఈఈ మెయిన్ (JEE Main 2023) పరీక్షలకు సమయం దగ్గరపడుతోంది. లక్షలాది మంది విద్యార్థులు పోటీ పడే జేఈఈ మెయిన్‌ తొలి విడత పరీక్ష(JEE main session 1 exam) జనవరి 24 నుంచి 31వరకు జరగనున్న విషయం తెలిసిందే. అయితే, ఈ పరీక్షకు దరఖాస్తు చేసుకొనేందుకు గడువు త్వరలోనే ముగియనుంది. ఈ నెల 12న రాత్రి 9గంటల వరకు మాత్రమే విద్యార్థులు దరఖాస్తులు చేసుకొనేందుకు అవకాశం ఉండగా.. దరఖాస్తు రుసుము మాత్రం అదేరోజు రాత్రి 11.50గంటల వరకు చెల్లించేందుకు ఎన్‌టీఏ అధికారులు అవకాశం కల్పించారు.  పరీక్ష కేంద్రాలు ఏయే నగరాల్లో నిర్వహిస్తారనే విషయాన్ని ఈ వారంలోనే వెల్లడించనుండగా.. అడ్మిట్‌ కార్డులను మాత్రం వచ్చే వారం నుంచి డౌన్‌లోడ్‌ చేసుకొనేందుకు అందుబాటులో ఉంచనున్నారు. అయితే, ఇవి ఈ తేదీ నుంచి అందుబాటులో ఉంటాయనే విషయాలను మాత్రం అధికారులు ఇంకా వెల్లడించలేదు. 

మరోవైపు, జేఈఈ మెయిన్‌ రెండో విడత పరీక్ష కోసం విద్యార్థులు ఫిబ్రవరి 7 నుంచి మార్చి 7వరకు ఆన్‌లైన్‌లో దరఖాస్తు చేసుకోవాలని ఎన్‌టీఏ ఇప్పటికే ప్రకటించింది. రెండో విడత పరీక్ష(JEE main session 2 exam) ఏప్రిల్‌ 6నుంచి 12వరకు నిర్వహించనున్నారు. ఈ పరీక్ష నిర్వహించే నగరాల జాబితాను మార్చి మూడో వారంలో; అడ్మిట్‌ కార్డులను మార్చి చివరి వారం నుంచి అందుబాటులో ఉంచనున్నారు.

తొలి విడత పరీక్షకు దరఖాస్తు గడువు మరో మూడు రోజుల్లో ముగియనుండటంతో ఇప్పటికే రిజిస్ట్రేషన్లు పూర్తి చేసుకోని విద్యార్థులు ఇలా దరఖాస్తు చేసుకోండి.

• తొలుత అధికారిక వెబ్‌సైట్‌ jeemain.nta.nic.inను సందర్శించండి. 
• జేఈఈ మెయిన్‌ 2023 అప్లికేషన్‌ లింక్‌పై క్లిక్‌ చేయండి
• అవసరమైన వివరాలను నమోదు చేయడం ద్వారా రిజిస్టర్‌ అవ్వండి
• పరీక్ష ఫీజు చెల్లించి దరఖాస్తును సమర్పించండి
• ఆ దరఖాస్తును డౌన్‌లోడ్‌చేసి భవిష్యత్తు అవసరాల కోసం ఆ కాపీని మీ వద్దే ఉంచుకోండి