కనకదుర్గ పైవంతెన ప్రజల చిరకాల స్వప్నం

విజయవాడ: కనకదుర్గ ఆలయం వద్ద పైవంతెనతో విజయవాడ వాసుల చిరకాల స్వప్నం సాకారమైందని ఎంపీ కేశినేని నాని అన్నారు. కేంద్ర మంత్రి నితిన్‌ గడ్కరీ సహకారంతోనే ఈ వంతెన సిద్ధమైందని, వీడియో కాన్ఫరెన్స్‌ ద్వారా ఆయనే ప్రారంభిస్తారని చెప్పారు. నిర్మాణం పూర్తి చేసుకున్న వంతెనను రోడ్డు రవాణా, రహదారుల మంత్రిత్వ శాఖ ప్రాంతీయ అధికారి ఎస్‌కే సింగ్‌, జాతీయ రహదారుల అభివృద్ధి సంస్థ అధికారులతో కలిసి నాని పరిశీలించారు. ఒకవైపు సాంకేతికత, మరోవైపు ప్రకృతి అందాలతో మిళితమైన ఈ ఫ్లైఓవర్‌తో విజయవాడ వాసుల కల నెరవేరిందని చెప్పారు. సెప్టెంబర్‌ 4న గడ్కరీ వీడియో కాన్ఫరెన్స్‌ ద్వారా దిల్లీ నుంచి ప్రారంభిస్తారని ఆయన తెలిపారు. దీని నిర్మాణం చేపట్టిన అప్పటి ముఖ్యమంత్రి చంద్రబాబునాయుడు, గడ్కరీ, కేంద్ర ప్రభుత్వానికి ఈ సందర్భంగా ఆయన కృతజ్ఞతలు తెలిపారు.