తబలా వాయించి.. గిన్నిస్‌కు ఎక్కి..!

ఇంటర్నెట్‌ డెస్క్‌: భారతీయ సంగీతంలో తబలా వాయిద్యం ప్రత్యేకమైంది. ఈ తబలాను నేర్పుగా వాయిస్తూ అందరితోనూ ఔరా అనిపిస్తున్నారు కర్ణాటకకు చెందిన చేతన్‌కుమార్‌. తబలాను వాయించడంలో విశేష ప్రతిభ గడించిన చేతన్‌ ఇటీవల మహారాష్ట్రలో నిర్వహించిన ఓ కార్యక్రమంలో ఏకధాటిగా 4గంటల పాటు తబలా వాయించి గిన్నిస్‌ రికార్డులో స్థానం సంపాదించారు.

ఆయన తబలా వాయిస్తుంటే ఆ సంగీతానికి అక్కడి ప్రేక్షకులంతా మంత్రముగ్ధులవ్వక తప్పదు. ఏటా ఆ రాష్ట్రంలో జరిగే హంపి, దారువాట్‌లాంటి అనేక ఉత్సవాల్లో చేతన్‌ పాల్గొని తన తబలా సంగీతంతో భక్తుల్ని అలరిస్తారు. మహారాష్ట్రలోని సోలాపూర్‌లో ఇటీవల జరిగిన తాలానినాద్‌ కార్యక్రమంలో ఏకధాటిగా 4గంటల పాటు తబలా వాయించిన చేతన్‌ గిన్నిస్‌ రికార్డును నెలకొల్పారు. తబలాను వాయించడమే వృత్తిగా ఎంచుకున్న ఆయన తొలుత డా.అరవింద్‌కుమార్‌ వద్ద శిక్షణ పొందారు. తరువాత తుది మెరుగులు దిద్దుకొని మరింత రాటుదేలారు. తబలాను వాయించే విద్యలో ప్రావీణ్యం గడించిన చేతన్‌ తాను నేర్చుకున్న విద్యను పిల్లలకు ఉచితంగా నేర్పిస్తున్నారు.