కొవిడ్‌ మార్గదర్శకాలను విధిగా పాటించాలి

ఉత్తర్వులు జారీ చేసిన ఎస్‌ఈసీ

విజయవాడ: పరిషత్ ఎన్నికల్లో కొవిడ్ మార్గదర్శకాలను తప్పనిసరిగా పాటించాలని ఆదేశిస్తూ ఎస్ఈసీ నీలం సాహ్ని ఉత్తర్వులు జారీ చేశారు. ప్రచారంలో పాల్గొంటున్న అభ్యర్థులు, రాజకీయ పార్టీలు కేంద్ర ఎన్నికల సంఘం జారీ చేసిన నిబంధనలకు అనుగుణంగా వ్యవహరించాలని స్పష్టం చేశారు. కొవిడ్ వ్యాక్సినేషన్ లో పోలీసు సిబ్బందికి, ఎన్నికల విధుల్లో పాల్గొంటున్న సిబ్బందికి మొదటి ప్రాధాన్యత ఇవ్వాలని సూచించారు. కేంద్ర హోం శాఖ ఉత్తర్వులకు అనుగుణంగా పోలింగ్ కేంద్రాలతో పాటు ప్రచారంలో విధిగా 6 అడుగుల భౌతిక దూరం పాటించాలని స్పష్టం  చేశారు.ముఖానికి మాస్కులు, శానిటైజర్లు, సబ్బులు ఇతర అత్యవసర సామగ్రిని పోలింగ్ సిబ్బందికి అందుబాటులో ఉంచాలని ఆదేశించారు. పోలింగ్ సమయంలో ఓటింగ్ వేసే గదిలో ఒక్కసారికి ఒక్క ఓటరును మాత్రమే అనుమతించాలని స్పష్టం  చేశారు. ప్రచారంలో అభ్యర్థుల వెంట అయిదుగురు వ్యక్తులు కంటే ఎక్కువ మంది ఉండకూడదని ఎస్‌ఈసీ వెల్లడించారు.