KTR: ‘గిఫ్ట్‌ ఏ స్మైల్‌’ కింద వాహనాలు పంపిణీ చేసిన మంత్రి కేటీఆర్‌

హైదరాబాద్‌: తన పుట్టినరోజు సందర్భంగా ‘గిఫ్ట్‌ ఏ స్మైల్‌ కార్యక్రమం’ కింద వికలాంగులకు ప్రకటించిన వాహనాలను మంత్రి కేటీఆర్‌ పంపిణీ చేశారు. హైదరాబాద్‌ జలవిహార్‌లో ఏర్పాటు చేసిన కార్యక్రమంలో వీటిని అందజేశారు. తన పుట్టిన రోజుకు ఫ్లెక్సీలు, బ్యానర్ల కోసం డబ్బు వృథా చేయొద్దని కోరిన కేటీఆర్‌.. గత ఏడాది నుంచి గిఫ్ట్‌ ఏ స్మైల్ కార్యక్రమాన్ని చేపట్టారు. గతేడాది సిరిసిల్లలో ఆరు అంబులెన్స్‌లను దానం చేసిన ఆయన.. ఈ ఏడాది 130 స్కూటర్లను వికలాంగులకు అందించారు. కేటీఆర్‌ పిలుపు మేరకు ఎర్రబెల్లి దయాకర్‌రావు 150, ఎమ్మెల్యే కృష్ణారావు 100, ఎమ్మెల్సీలు నవీన్‌ 100, శంబీపూర్‌ రాజు 63, ఎమ్మెల్యే వివేకానంద్‌ 50 చొప్పున స్కూటర్లు అందించేందుకు ముందుకొచ్చారని ఈ సందర్భంగా కేటీఆర్‌ ప్రకటించారు. రాజకీయాల్లో భాగంగా ప్రత్యేక రోజుల్లో ఫ్లెక్సీలు, బ్యానర్లకు పెట్టే ఖర్చును ఇలాంటి మంచి కార్యక్రమాలకు వినియోగించాలని ఆయన కోరారు.