వరద ప్రభావిత ప్రాంతాల్లో కేటీఆర్‌ పర్యటన

హైదరాబాద్‌: నగరంలోని బైరామల్‌ గూడ కాలనీలో వరద ప్రభావిత ప్రాంతాన్ని తెలంగాణ మంత్రి కేటీఆర్‌ పరిశీలించారు. హోం మంత్రి మహమూద్‌ అలీ, సీఎస్‌ సోమేశ్‌ కుమార్‌, డీజీపీ మహేందర్‌రెడ్డితో కలిసి క్షేత్రస్థాయిలో పరిస్థితులను పర్యవేక్షించారు. కాలనీల్లో నిలిచిన నీరు త్వరగా పోయేలా చర్యలు తీసుకోవాలని అధికారులను ఆదేశించారు. బైరామల్‌గూడ కాలనీ సమస్యలపై ప్రజలతో మాట్లాడారు. ముంపు ప్రాంతాల్లో ఇబ్బందులను స్థానికులు.. మంత్రి కేటీఆర్‌, అధికారులకు వివరించారు. ముంపునకు గురైన ఓ నివాసంలోకి వెళ్లి బాధితులను వివరాలు అడిగి తెలుసుకున్నారు. ఎమ్మెల్యే సుధీర్‌రెడ్డి, స్థానిక కార్పొరేటర్లకు కేటీఆర్‌ పలు సూచనలు చేశారు. ఆ తర్వాత అంబర్‌పేట, రామంతాపూర్‌ చెరువు, హబ్సిగూడలోని వరద ప్రభావిత ప్రాంతాలను అధికారులతో కలిసి పరిశీలించారు. బాధితులను ఆదుకుంటామని ఈ సందర్భంగా మంత్రి హామీ ఇచ్చారు.

మరోవైపు నగరంలోని టోలిచౌకిలోనూ మంత్రి కేటీఆర్‌ పర్యటించారు. ఎంపీ అసదుద్దీన్‌ ఒవైసీతో కలిసి టోలిచౌకి నదీంకాలనీలో జీహెచ్‌ఎంసీ, ఎన్డీఆర్‌ఎఫ్‌ సహాయచర్యలను పర్యవేక్షించారు. షాతం చెరువుకు వరద నీరు వెళ్లాల్సిన నాలా కుంచించుకుపోయిందని.. అందువల్లే నదీంకాలనీకి వరద ముంచెత్తిందని స్థానికులు కేటీఆర్‌కు తెలిపారు. నీట మునిగిన కాలనీల్లో ఉన్నవారిని బయటకు తీసుకొచ్చేందుకు చర్యలు తీసుకోవాలని కోరారు. టోలిచౌకి పర్యటనలో భాగంగా షాతం చెరువును పరిశీలించేందుకు వెళ్లిన సమయంలో నీటి ప్రవాహం ఎక్కువగా ఉండటంతో కేటీఆర్ వాహనం చెరువు వద్దకు వెళ్ళలేకపోయింది. దీంతో ఎంపీ అసదుద్దీన్ ఓవైసీ ఆయన వాహనంలో కేటీఆర్‌ను తీసుకెళ్లి చెరువును పరిశీలించారు.