Andhra News: హ్యాపీనెస్ట్‌ జాప్యంపై సీఆర్డీఏకు లీగల్‌ నోటీసులు

అమరావతి: హ్యాపీనెస్ట్‌ జాప్యంపై సీఆర్డీఏకు 28 మంది లీగల్‌ నోటీసులిచ్చారు. 2018లో సీఆర్డీఏ ద్వారా హ్యాపీనెస్ట్‌ నిర్మాణానికి శ్రీకారం చుట్టారు. అందుబాటు ధరల్లో టవర్స్‌, 1200 ప్లాట్స్‌ నిర్మాణానికి నిర్ణయం జరిగింది. దీంతో గంటలో మొత్తం ప్లాట్స్‌ అమ్ముడుపోవడంతో ప్రాజెక్టుకు డిమాండ్‌ పెరిగింది. సీఆర్డీఏ ఒప్పందం మేరకు కొనుగోలుదారులు తొలి వాయిదాగా 10శాతం చెల్లించారు. అనంతరం ప్రాజెక్టు నిర్మాణానికి సంబంధించి షాపూర్‌జీ పల్లోంజీ టెండర్లకు ముందుకొచ్చింది. డిసెంబర్‌ 31, 2021 నాటికి ప్లాట్లు అందజేయాలని ఒప్పందం జరిగింది.

ఆ గడువు తీరడంతో చెల్లించిన 10శాతం సొమ్ముతో పాటు అదనంగా 14శాతం వడ్డీ చెల్లించాలని కొనుగోలుదారులు సీఆర్డీఏకు నోటీసులు ఇచ్చారు. నష్టపరిహారం కింద రూ.20లక్షలు ఇవ్వాలని అందులో వెల్లడించారు. దీంతో పాటు సీఆర్డీఏపై రేరా చట్టం కింద కేసు వేస్తామని నోటీసుల్లో పేర్కొన్నారు. ఈ మేరకు న్యాయవాది కారుమంచి ఇంద్రనీల్‌ ద్వారా సీఆర్డీఏ అధికారులకు కొనుగోలుదారులు నోటీసులు పంపారు.