రాజేంద్రనగర్‌లో ఆవుపై చిరుత దాడి

ఇంటర్నెట్‌ డెస్క్‌: రాజేంద్రనగర్‌ పరిసరాల్లో మరోసారి చిరుత కదలికలు కలకలం రేపుతున్నాయి. ప్రొఫెసర్‌ జయశంకర్‌ వ్యవసాయ విశ్వవిద్యాలయం వాలంటరీ రైస్‌ రీసెర్చ్‌ సెంటర్‌ వద్ద ఆవుపై చిరుత దాడి చేసిందని స్థానికులు పోలీసులకు సమాచారమిచ్చారు. దీంతో పోలీసులు అటవీశాఖ అధికారులను అప్రమత్తం చేశారు. ఆదివారం రాత్రి రెండు లేగ దూడలపై చిరుత దాడి చేసిందని స్థానికులు వెల్లడించారు. చిరుత కదలికలతో జనం భయాందోళనకు గురవుతున్నారు.

రాజేంద్రనగర్‌లోని అటవీ ప్రాంతంలో పలుమార్లు చిరుత దర్శనమిచ్చింది. గతేదాడి జూన్‌లోనూ వ్యవసాయ పరిశోధనా విస్తరణ సంస్థ, గ్రేహౌండ్స్‌ ఫైరింగ్‌ శిక్షణ ప్రాంతంలో సంచరించింది. గ్రేహౌండ్స్‌ ఫైరింగ్‌ రేంజ్‌ పరిసరాల్లో చిరుత సంచరిస్తున్న దృశ్యాలు అక్కడి సీసీ కెమెరాల్లో నమోదయ్యాయి.