తిరుమలలో చిరుత సంచారం

తిరుమల: తిరుమల మొదటిఘాట్‌రోడ్డులో చిరుత సంచారం కలకలం సృష్టిస్తోంది. రెండు రోజులక్రితం రెండవ ఘాట్‌రోడ్డులో చిరుత రోడ్డును దాటుతుండగా భక్తులు సెల్‌ఫోన్‌లో చిత్రీకరించిన విషయం తెలిసిందే. తాజాగా.. ఆదివారం మొదటిఘాట్‌రోడ్డులోని ఏనుగుల ఆర్చివద్ద చిరుత రోడ్డుకు పక్కనే ఉన్న చెట్టుకింద జింకల కోసం వేచి ఉంది. ఘాట్‌రోడ్డులో వాహనాల్లో ప్రయాణిస్తున్న భక్తులు చిరుతను గమనించి తమ సెల్‌ఫోన్‌లలో చిరుతను చిత్రీకరించారు. సాధారణంగా ఈ మార్గంలో భక్తులు రోడ్డు పక్కన ఉన్న జింకలకు ఆహారాన్ని అందిస్తుంటారు. దీంతో తరచూ జింకలు ఘాట్‌రోడ్డు పక్కగా వేచి ఉంటాయి. ఇదే సమయంలో ఆహారం కోసం చిరుత ఘాట్‌రోడ్డు పక్కకు వస్తోంది. తరచూ చిరుతలు ఘాట్‌రోడ్డులో కనిపిస్తుడడంతో భక్తులు భయాందోళనకు గురవుతున్నారు. ఇప్పటికే తితిదే అటవీశాఖ అధికారులు జింకలకు ఆహారాన్ని అందించవద్దని సూచిస్తున్నా... భక్తులు వినడం లేదు. దీంతో జింకల కోసం పులులు రోడ్డు వరకు వస్తున్నాయి.