మీసాలు ట్రిమ్‌ చేయనందుకు ఉద్యోగం నుంచి సస్పెండ్‌!

భోపాల్‌: మీసాలు ట్రిమ్‌ చేయడానికి నిరాకరించాడనే కారణంతో మధ్యప్రదేశ్‌కు చెందిన ఓ కానిస్టేబుల్‌పై సస్పెన్షన్‌ వేటు పడింది. తనను ఉద్యోగం నుంచి తొలగించినా సరే ఈ విషయంలో రాజీపడేది లేదంటున్నాడు ఆ కానిస్టేబుల్‌. అసలేం జరిగిందంటే..?

మధ్యప్రదేశ్‌ పోలీస్‌ శాఖలో రాకేశ్‌ రానా అనే వ్యక్తి కానిస్టేబుల్‌గా నియమితులయ్యారు. విధుల్లో ఉండగా మీసాలను ట్రిమ్‌ చేయాలని ఆదేశాలు ఇచ్చినప్పటికీ.. వాటిని పాటించేందుకు నిరాకరించాడట రాకేశ్‌ రానా. దీంతో నిబంధనలను పాటించనందుకు గానూ అతడిని సస్పెండ్‌ చేశారు. ‘‘పోలీస్ శాఖలో ఇలాంటి వైఖరిని ప్రోత్సహించం. మీసాన్ని మెడవరకూ పెంచాడు. వాటిని ట్రిమ్‌ చేయకుండా వస్తే.. అక్కడ పని చేసే సిబ్బందిపైనా రానా ప్రభావం పడేలా ఉంది. అందుకే విధుల నుంచి సస్పెండ్‌ చేయాల్సి వచ్చింది’’ అని అసిస్టెంట్‌ ఇన్‌స్పెక్టర్‌ జనరల్‌ ప్రశాంత్‌ వర్మ తెలిపారు.

జరిగిన ఘటనపై రాకేశ్‌ రానా స్పందించాడు. ‘‘ఉద్యోగంపరంగా ఎలాంటి ఫిర్యాదులూ లేవు. నేను రాజ్‌పుత్‌ వంశం నుంచి వచ్చా. మీసాలు ఉండటమే మాకు గర్వకారణం. దాని కోసం సస్పెండ్‌ అయినా ఫర్వాలేదు. కానీ ఈ విషయంలో రాజీపడే ప్రసక్తేలేదు. నేనెప్పటికీ మీసాలు ట్రిమ్‌ చేయను. ఇది నా ఆత్మగౌరవంతో ముడిపడిన విషయం’’ అని చెప్పాడు.