CM KCR: మల్లన్నసాగర్‌ను జాతికి అంకితం చేసిన సీఎం కేసీఆర్‌

తొగుట: కాళేశ్వరం ఎత్తిపోతం పథకంలో కీలక ఘట్టం ఆవిష్కృతమైంది. సిద్దిపేట జిల్లా తొగుట మండలం తుక్కాపూర్‌లో నిర్మించిన మల్లన్నసాగర్‌ జలాశయాన్ని సీఎం కేసీఆర్‌ జాతికి అంకితం చేశారు. ఈ సందర్భంగా భూగర్భంలో ఏర్పాటు చేసిన పంప్‌హౌస్‌లో మోటార్లను సీఎం ప్రారంభించి లాంఛనంగా నీటిని విడుదల చేశారు. దీంతో గోదావరి జలాలు ఒక్కసారిగా పరవళ్లు తొక్కాయి. అనంతరం పంపిణీ వ్యవస్థ వద్దకు వెళ్లి గోదావరి జలాలకు సీఎం కేసీఆర్‌, మంత్రులు హరీశ్‌రావు, శ్రీనివాస్‌గౌడ్‌, దుబ్బాక ఎమ్మెల్యే రఘునందన్‌రావు తదితరు ప్రత్యేక పూజలు నిర్వహించారు.

కాళేశ్వరం ప్రాజెక్టులోనే అతిపెద్ద జలాశయంగా మల్లన్నసాగర్‌కు గుర్తింపు ఉంది. 50 టీఎంసీల సామర్థ్యంతో దీన్ని నిర్మించారు. ఈ జలాశయం నుంచి 15.70లక్షల ఎకరాలకు సాగునీరు చేరనుంది. ఉత్తర, దక్షిణ తెలంగాణ ప్రాంతాలకు వరప్రదాయినిగా మల్లన్నసాగర్‌ మారనుంది. ఈ జలాశయంలో 8 పంపులను ఏర్పాటు చేశారు. వీటిలో ఒక్కో పంపు సామర్థ్యం 43 మెగావాట్లు. ఎస్సారెస్పీ తర్వాత అతిపెద్ద రిజర్వాయర్‌గా మల్లన్నసాగర్‌ నిలిచింది. హైదరాబాద్‌ ప్రజలకు తాగునీరు కోసం భవిష్యత్తులో 30 టీఎంసీల నీటిని కేటాయించనున్నారు.