కళ్లకు గంతలతో బైక్‌ నడుపుతూ ప్రచారం

చెన్నై: తమిళనాడులో ఎన్నికలు దగ్గరపడుతున్న వేళ ప్రచార జోరు పెరిగింది. ఓటర్లను ఆకట్టుకునేందుకు నేతలు అన్ని రకాల ప్రయత్నాలు చేస్తున్నారు. ఇందులో భాగంగా ఓ వ్యక్తి తమ నాయకుడిని గెలిపించాలంటూ కళ్లకు గంతలు కట్టుకొని ద్విచక్రవాహనం నడుపుతూ ప్రచారం నిర్వహించడం చర్చనీయాంశమైంది. తొండముత్తూర్‌ నియోజకవర్గం నుంచి పోటీలో ఉన్న అన్నాడీఎంకే అభ్యర్థి ఎస్పీ వేలుమణిని గెలిపించాలంటూ యూఎంటీ రాజా అనే వ్యక్తి కళ్లకు గంతలతో ద్విచక్రవాహనం నడుపుతూ ప్రచారం నిర్వహించారు.

వేలుమణి ఫొటోను స్కూటీ ముందుభాగానికి అతికించుకొని అన్నాడీఎంకే ప్రభుత్వ పథకాలను ఓటర్లకు తెలియజేస్తూ ప్రచారం చేపట్టాడు. ‘పదేళ్ల క్రితం కళ్లు తెరుచుకొని కూడా రోడ్ల మీద నడిచేందుకు తిప్పలు పడేవాళ్లం. కానీ ప్రభుత్వం చేపట్టిన అభివృద్ధి పనులతో కళ్లకు గంతలు కట్టుకొని కూడా రోడ్లపై వాహనం నడపవచ్చు’ అని రాజా ప్రచారం నిర్వహిస్తున్నాడు. కళ్లకు గంతలతో బైక్‌ నడుపుతున్న వీడియోలు సోషల్‌ మీడియాలో వైరల్‌గా మారాయి. మరోవైపు రహదారులపై  ఈ తరహా చర్యలు సరికావని నెటిజన్లు ఆగ్రహం వ్యక్తం చేస్తున్నారు.