Viral Video: కర్వాచౌత్‌ రోజున ప్రియురాలిని షాపింగ్‌కు తీసుకెళ్లి.. భార్యకు అడ్డంగా దొరికి..!

దిల్లీ: కర్వాచౌత్‌ రోజున ప్రియురాలితో షాపింగ్ చేస్తోన్న ఓ వ్యక్తికి అనుకోని పరిస్థితి ఎదురైంది. అక్కడికి వచ్చిన భార్యకు అడ్డంగా దొరికి, బుక్కయ్యాడు. దానికి సంబంధించిన వీడియో ఇప్పుడు నెట్టింట్లో వైరల్‌గా మారింది. ఉత్తర్‌ప్రదేశ్‌కు చెందిన ఘజియాబాద్ మార్కెట్‌లో ఈ దృశ్యం చోటుచేసుకుంది.

కర్వాచౌత్ రోజున ఓ ప్రబుద్ధుడు ప్రియురాలితో కలిసి షాపింగ్‌కు వచ్చాడు. అతడి భార్యతో గొడవ కావడంతో ఆమె పుట్టింట్లో ఉంటుంది. అయితే ఆ రోజు ఆమె, తన తల్లితో కలిసి అదే మార్కెట్‌కు వచ్చింది. అక్కడ వేరే మహిళతో ఉన్న భర్తను చూసి, ఆమె ఆగ్రహం కట్టలు తెంచుకుంది. ఆ మార్కెట్‌లో అందరిముందే అతడి కాలర్‌ పట్టుకొని వాయించింది. ఆమె తరఫువారు కూడా అతడి పనిపట్టారు. అడ్డుగా వచ్చిన ప్రియురాలికి కూడా వారి చేతిలో దెబ్బలు తప్పలేదు. రద్దీ మార్కెట్‌లో గొడవ జరగడంతో చాలామంది అక్కడ గుమిగూడారు. బయటకు వెళ్లి మీ గొడవ చూసుకోవాలని యజమాని వారికి గట్టిగా చెప్పాడు. కాగా, దీనిపై అతడి భార్య పోలీసులకు ఫిర్యాదు చేసింది. భర్త క్షేమం కోరుతూ చేసుకొనే కర్వాచౌత్‌ పండగ షాపింగ్‌లో ఈ గొడవ చేసుకోవడం గమనార్హం.