Telangana News: నాలా ప్రమాదాలు జరిగితే అధికారులదే బాధ్యత: కేటీఆర్‌

హైదరాబాద్‌: స్ట్రాటజిక్‌ నాలా డెవలప్‌మెంట్‌ అమలుపై అధికారులతో రాష్ట్ర పురపాలక శాఖ మంత్రి కేటీఆర్‌ సమీక్ష నిర్వహించారు. వచ్చే వర్షాకాలం నాటికి నాలాల పనులు పూర్తి చేయాలని అధికారులను ఆదేశించారు. ఎన్ని చర్యలు తీసుకున్నా ప్రమాదాలు జరుగుతున్నాయని, నాలాలకు ఫెన్సింగ్‌, రక్షణ గోడ వంటివి ఏర్పాటు చేయాలని సూచించారు. నాలా ప్రమాదాలు జరిగితే ఇకపై అధికారులనే బాధ్యులను చేస్తామని మంత్రి కేటీఆర్‌ స్పష్టం చేశారు. ఈ మేరకు నాలా ప్రమాదాలు జరగకుండా సమగ్ర ప్రణాళిక రూపొందించాలని చెప్పారు. నాలాల పనులను జీహెచ్‌ఎంసీ కమిషనర్‌ ప్రతివారం సమీక్షించాలని, మేజర్‌ కార్పొరేషన్లలోనూ నాలాలపై రక్షణ చర్యలకు కార్యాచరణ సిద్ధం చేయాలని మంత్రి కేటీఆర్‌ వివరించారు.