Niranjan reddy: దశాబ్ది ఉత్సవాలు.. చారిత్రక జ్ఞాపకంగా మిగిలిపోవాలి: మంత్రి నిరంజన్‌రెడ్డి

హైదరాబాద్: వ్యవసాయ రంగానికే తెలంగాణ ప్రభుత్వ ప్రాధాన్యత ఉంటుందని.. దశాబ్ది ఉత్సవాలు వ్యవసాయ శాఖతో ప్రారంభం కావడం గర్వకారణమని ఆ శాఖ మంత్రి సింగిరెడ్డి నిరంజన్‌ రెడ్డి తెలిపారు. భవిష్యత్‌లోనూ వ్యవసాయ రంగానికే పెద్దపీట వేస్తామని ఆయన స్పష్టం చేశారు. వ్యవసాయ శాఖలో దశాబ్ది ఉత్సవాల నిర్వహణపై ఆ శాఖ ఉన్నతాధికారులతో సచివాలయంలో మంత్రి వీడియో కాన్ఫరెన్స్ నిర్వహించారు.

వ్యవసాయ శాఖ తరఫున జరిగే దశాబ్ది ఉత్సవాలు చారిత్రక జ్ఞాపకంగా మిగిలిపోవాలని అధికారులకు మంత్రి సూచించారు. వ్యవసాయ శాఖ అధికారులు, ఉద్యోగులు ఈ కార్యక్రమాల్లో అంకితభావంతో పనిచేయాలని ఆదేశించారు. జూన్ 3వ తేదీన రాష్ట్రవ్యాప్తంగా అన్ని రైతు వేదికలను సుందరంగా ముస్తాబు చేయాలన్నారు. రాష్ట్రంలో వ్యవసాయ శాఖలో నమోదైన విజయాలను తెలియజేసేలా పెద్దఎత్తున పోస్టర్లు, ఫ్లెక్సీలు ఏర్పాటు చేయాలని ఆదేశించారు. రైతులకు అవి అర్థమయ్యే విధంగా వివరించాలని, రైతు వేదికల్లో పండుగ వాతావరణం కనిపించాలని దిశా నిర్దేశం చేశారు. వ్యవసాయ మార్కెట్ యార్డులను మామిడి తోరణాలు, విద్యుత్తు దీపాలతో అలంకరించి రైతులతో సమావేశాలు నిర్వహించాలని చెప్పారు. ఆయా మార్కెట్ల పరిధిలో నాణ్యమైన పంటలు పండించే ఉత్తమ రైతులను గుర్తించి సత్కరించాలని సూచించారు. రాష్ట్రంలో వ్యవసాయ రంగానికి జరిగిన మేలును యావత్ రైతాంగానికి వివరించాలని అధికారులను మంత్రి నిరంజన్‌రెడ్డి ఆదేశించారు.