Andhra News: పారదర్శక మైనింగ్ లీజుల కోసం ‘ఇ-ఆక్షన్‌’: పెద్దిరెడ్డి రామచంద్రారెడ్డి

అమరావతి: ఆంధ్రప్రదేశ్‌లో మైనింగ్ లీజుల విషయంలో పారదర్శకంగా ఉండేందుకు ఇ-ఆక్షన్ విధానం అమలులో ఉందని రాష్ట్ర గనుల శాఖ మంత్రి పెద్దిరెడ్డి రామచంద్రారెడ్డి తెలిపారు. లీజుల జారీ విషయంలో జాప్యం లేకుండా అనుమతులు ఇవ్వడంపై దృష్టి పెట్టాలని అధికారులను ఆదేశించారు. సచివాలయంలో గనుల శాఖపై మంత్రి సమీక్ష నిర్వహించారు.

అటవీ, పర్యావరణ శాఖ అనుమతులు వచ్చే విషయంలోనూ ప్రత్యేకంగా కార్యాచరణ చేపట్టాలని సూచించారు. గనుల లీజు ద్వారా వీలైనంత ఎక్కువ ఆదాయం వచ్చేలా ప్రణాళిక రూపొందించాలని సూచించారు. ప్రస్తుతం ఏపీలో 5,146 స్వల్ప ఖనిజాలకు సంబంధించిన లీజులు ఉన్నాయని.. ఇందులో 2,276 లీజులకు మాత్రమే అన్ని రకాల అనుమతులున్నాయని మంత్రి తెలిపారు. మిగతా వాటికి కూడా అన్ని రకాల అనుమతులు తీసుకునే అంశంపై దృష్టి పెట్టాలన్నారు. గనులు, క్వారీల నుంచి వచ్చే వ్యర్థాలను అటవీ భూముల్లో వదిలేస్తే కఠిన చర్యలు తీసుకుంటామని మంత్రి హెచ్చరించారు.