TS News: స్థానికులకే మద్యం దుకాణాలు: మంత్రి శ్రీనివాస్‌గౌడ్‌

హైదరాబాద్‌: తెలంగాణలో నూతన మద్యం దుకాణాలకు షెడ్యూల్‌ విడుదలైంది. రాష్ట్రంలో ఈరోజు నుంచే నూతన మద్యం దుకాణాలకు దరఖాస్తు చేసుకోవచ్చని ఎక్సైజ్‌శాఖ మంత్రి శ్రీనివాస్‌గౌడ్‌ తెలిపారు. గౌడ కులస్తులకు 15శాతం రిజర్వేషన్‌ కల్పించామని మంత్రి పేర్కొన్నారు. కులవృత్తి రీత్యా గౌడ కులస్తులకు ఇదొక చారిత్రాత్మకమైన నిర్ణయమని మంత్రి తెలిపారు. వందశాతం లాభాలతో నడిచే వ్యాపారమైన మద్యం దుకాణాలను స్థానికులకే కేటాయిస్తామని స్పష్టం చేశారు. అన్ని విధాలుగా స్థానికులకు లాభాలు చేకూరే విధంగా మద్యం పాలసీని రూపొందించినట్టు వివరించారు. మద్యం పాలసీపై ఏర్పాటు చేసిన మీడియా సమావేశంలో మంత్రి మట్లాడారు. గతంలో కల్తీ, విదేశీ మద్యం అమ్మేవారని, ఇప్పుడు ఆ పరిస్థితిలేదని చెప్పారు. గంజాయి వ్యాపారం చేసే వారిపై కఠిన చర్యలు తీసుకుంటామని, పీడీ యాక్టు కూడా ఉపయోగిస్తామని మంత్రి తెలిపారు. గంజాయి అమ్మేవారి వివరాలు చెప్పిన వారి పేర్లు గోప్యంగా ఉంచుతామన్నారు. ఇవాళ్టి నుంచి ఈనెల 18వరకు నూతన మద్యం దుకాణాలకు దరఖాస్తులు స్వీకరిస్తారని వివరించారు.