రాఖీ పంపిన మహిళకు మోదీ ధన్యవాదాలు

ఇంటర్నెట్‌ డెస్క్‌: ఇటీవల రక్షాబంధన్‌ సందర్భంగా తనకు రాఖీ పంపిన ఓ మహిళకు ధన్యవాదాలు తెలుపుతూ ప్రధాని మోదీ రాసిన లేఖకు సామాజిక మాధ్యమాల్లో లైకులు వెల్లువెత్తుతున్నాయి. ఉత్తరాఖండ్‌లోని రుద్రపూర్‌కు చెందిన దీపా మటేలా జులై 28న స్పీడ్‌పోస్ట్‌ ద్వారా ప్రధాని మోదీ, ఆ రాష్ట్ర ముఖ్యమంత్రి త్రివేంద్రసింగ్‌ రావత్‌కు ప్రత్యేకంగా రాఖీలు పంపారు. దీనికి ఆనందం వ్యక్తం చేసిన మోదీ సోదరభావంతో ప్రేమను పంచుకున్న దీపా మటేలాకు ధన్యవాదాలు తెలుపుతూ లేఖ రాశారు. ఈ సందర్భంగా లేఖలో ఓ సందేశం కూడా రాశారు. అన్నాచెల్లెళ్లు ఒకరికొకరు రక్షగా ఉండాలని తెలిపే భారత సంస్కృతి ఎంతో గొప్పదన్న ఆయన రక్షాబంధన్‌ పండుగ మన మధ్య ఆప్యాయతను పెంచుతోందని అన్నారు. ఇతరుల పట్ల సానుభూతి కలిగి ఉండాలని కరోనా మనకు నేర్పుతోందని మోదీ ఈ లేఖలో సందేశం ఇచ్చారు.